Trauer ass eppes, wat all Mënsch anescht empfanne kann, a fir Kanner ass dës Erfarung nach méi komplex. Wann eng nostoend Persoun stierft, stelle sech fir si Froen, op déi vill Erwuessener keng direkt Äntwert hunn. Dëst ass genee d’Missioun vun der ASBL Trauerwee, déi 2014 vun der Simone Thill gegrënnt gouf. Hir Aarbecht baséiert op enger perséinlecher Rees duerch d’Trauer an dem Wonsch, eppes ze schafen, wat si selwer deemools an hirer Zäit vu Verloscht vermësst huet.
Wéi alles ugefaangen huet
D’Simone Thill war eng jonk Mamm, wéi hire Mann u Kriibs gestuerwen ass. Zu dësem Zäitpunkt waren hir zwee Kanner nach ganz kleng: hire Jong dräi Joer al, an hir Duechter nëmme sechs Méint. An enger Zäit, wou si selwer versicht huet, duerch de Chaos vun der Trauer ze kommen, huet si gemierkt, wéi e grousse Manktem u spezifescher Ënnerstëtzung fir Kanner a Famillje bestanen huet. „Mir waren eng jonk Famill, an d’Leit woussten net, wéi se mat eis ëmgoe sollten,“ erkläert si. Amplaz vun engem geschützte Raum gouf si deemools just op e Psycholog verwisen – eppes, wat fir hir Kanner deemools net ugepasst geschéngt huet.
Dës Erfarung huet si dozou inspiréiert, selwer eppes op d’Been ze setzen. Nodeems si hiren eegenen Trauerprozess veraarbecht hat, huet si mat enger Frëndin, déi och e Verloscht erlieft hat, d’Iddi fir Trauerwee entwéckelt. No Formatiounen an Däitschland gouf 2014 de Grondstee fir d’ASBL geluecht.
Eng Plaz fir Trauer – awer och fir Hoffnung
Trauerwee bitt Kanner a Familljen e geschützte Raum, wou si hir Trauer op hir eege Manéier kënne veraarbechten. Hei ginn d’Kanner net nëmmen héieren, mee si léieren och, hir Emotiounen ze verstoen a mat hinnen ëmzegoen. Et geet drëm, dass si sech net eleng fillen, dass si mierken: "Meng Gefiller sinn normal."
D’Aarbecht baséiert op individuell ugepasste Ritualer a kreativen Aktivitéiten. All Kand huet zum Beispill eng Souvenirskëscht, wou et Erënnerungsstécker un déi verstuerwe Persoun sammele kann. Et gëtt och vill mat Bastelen, Zeechnen oder souguer mat Musek geschafft, well kreativ Ausdrocksmëttelen dacks hëllefen, Gefiller besser ze verschaffen. „Mir léieren de Kanner, hir eege Symboler a Ritualer ze fannen, fir mat hirer Trauer ëmzegoen,“ erkläert d’Simone Thill.
Eent vun de wichtegste Prinzippie bei Trauerwee ass och d’Ënnerstëtzung vun den Elteren. „All Member vun enger Famill trauert anescht, an et ass wichteg, dass d’Elteren e Beispill sinn, andeems si hir eegen Emotiounen éierlech weisen.“ Esou gi Kanner dozou bruecht, empathesch an oppe mat hire Gefiller ëmzegoen.
Trauer als gesellschaftlechen Tabu
Een Thema, dat d’Simone besonnesch beschäftegt, ass d’Tabuiséierung vun Trauer an eiser Gesellschaft. „Ganz dacks gëtt aus Angscht, eppes Falsches ze soen oder ze maachen, guer näischt gesot,“ erkläert si. Dat féiert dozou, dass déi betraffe Familljen sech isoléiert fillen. Kanner, déi héich sensibel op hir Ëmgéigend reagéieren, mierken dat direkt a schwätze vläicht selwer net méi iwwer déi Persoun, déi si verluer hunn.
Fir dësem Problem entgéintzewierken, setzt Trauerwee op Sensibiliséierung. Mat enger Wanderausstellung, Formatiounen a Podcaste probéiert d’ASBL, d’Thema an d’ëffentlech Diskussioun ze bréngen. Fir d’Simone ass et wichteg, dass net nëmmen a Familljen, mee och an der Schoul e sécheren Ëmgang mat dësem Thema gefërdert gëtt.
Éierlechkeet an Hoffnung: Wat Kanner wierklech brauchen
Eng vun den zentrale Missioune vun Trauerwee ass et de Kanner éierlech a kloer ze erklären, wat geschitt ass. Begrëffer wéi „doud“ oder „stierwen“ däerfen net duerch euphemistesche Sätz ersat ginn, wéi „e schléift“ oder „e war krank“, well dës d’Kanner oft verwiesselen an ängschtlech maachen. Amplaz sollen d’Kanner Fräiraum kréien, hir eege Versteesdemech vum Doud ze entwéckelen. „Wann e Kand froe stellt, ass et okay, ze soen: Ech weess et net,“ betount d’Simone. „D’Kanner hu ganz dacks hir eege kreativ Äntwerten, déi si selwer tréischt.“
Trotz dem Schmäerz vun der Trauer gëtt bei Trauerwee och ëmmer nees betount: „Et gëtt ni méi d’selwecht, awer et gëtt erëm eng Kéier gutt.“ Dëst ass de Message vun Hoffnung, deen d’Simone all betraffene Famill mat op de Wee gëtt.
Eng Plaz fir Empathie a Matgefill
D’Aarbecht vun der Simone Thill a vun Trauerwee weist, wéi wichteg et ass, Kanner an hirer Trauer ze gesinn, ze verstoen a si aktiv ze begleeden. Si huet net nëmmen eng sécher Plaz fir Trauer geschaf, mee och e Raum fir Hoffnung, Stäerkt a Gemeinschaft.
Comments